Varnarsamstarf við Bandaríkin

Varnarsamstarf við Bandaríkin

Varnarsamstarf Íslands og Bandaríkjanna

Öryggis- og varnarsamstarf Íslands og Bandaríkjanna byggist  á tvíhliða varnarsamningi ríkjanna frá árinu 1951, en tekur nú skýrt mið af mjög breyttum aðstæðum sem endurspeglast í sameiginlegri yfirlýsingu ríkjanna frá árinu 2006, þar sem kveðið er á um mjög fjölþætt samstarf á sviði öryggis- og varnarmála. Á undanförnum árum hefur samstarfið verið þróað frekar og tekur nú til mun fleiri þátta en áður. Má þar nefna málefni norðurslóða, þ.m.t. umhverfisöryggi, leit og björgun á hafi, auk varna gegn netvá, hryðjuverkum og skipulagðri glæpastarfsemi. Einnig fer fram reglubundið samráð háttsettra embættismanna um öryggis- og varnarmál á breiðum grunni og var síðasti fundur af því tagi í janúar 2012. Þar var rætt um norðurslóðir sem og öryggis- og varnarmál í víðu samhengi, ekki síst hvað varðar borgaralegt öryggi og ráðstafanir sem að því lúta. Höfðu sömu mál verið á dagskrá utanríkisráðherra Íslands og Bandaríkjanna í Washington í maí 2011.

Þrátt fyrir breyttar aðstæður standa varnarskuldbindingar Bandaríkjanna gagnvart Íslandi á grundvelli varnarsamningsins óhaggaðar og sem fyrr segir hafa Bandaríkin reglubundna viðveru á Íslandi á vegum loftrýmisgæslu Atlantshafsbandalagsins og í tilefni af Norður-Víkingi.