Ráðherra ræðir efnahagsmál og Brexit hjá OECD

23.6.2016

  • Lilja  Alfreðsdóttir og Mari Kiviniemi hjá OECD
    Lilja Alfreðsdóttir og Mari Kiviniemi hjá OECD

Lilja Alfreðsdóttir utanríkisráðherra heimsótti í morgun Efnahags- og framfarastofnunina, OECD, í París og átti fund með aðstoðarframkvæmdastjóranum, Mari Kiviniemi. Þær ræddu greiningu stofnunarinnar á afleiðingum mögulegrar útgöngu Breta úr Evrópusambandinu, Brexit, sem greidd eru atkvæði um í dag, og fóru yfir stöðu og horfur í efnahagsmálum á Íslandi.

„Samstarf íslenskra stjórnvalda og OECD er mjög mikilvægt þar sem stofnunin býr yfir gríðarlegri sérþekkingu á svið efnahagsmála. Greiningar þeirra skipta okkur miklu í hagstjórn og áætlanagerð,“ segir Lilja. Hún upplýsti aðstoðarframkvæmdastjórann um efnahagsaðgerðir íslenskra stjórnvalda, m.a. við afléttingu hafta og þær ræddu efnahagshorfur og áskoranir sem fram undan eru.

Stefnumál OECD eru að ná sem mestum og varanlegustum hagvexti og sem hæstu atvinnustigi í aðildarríkjunum og stuðla að auknum lífsgæðum. Þátttaka Íslands nær til um 200 ólíkra efnisþátta innan stofnunarinnar, þar á meðal við greiningu á stöðu efnahagsmála á Íslandi en einnig á sviði verslunar, sjávarútvegs, vísinda og tækni, stjórnsýslu, landbúnaðar, umhverfismála og samgangna.

Til baka Senda grein