Fundur um málefni Alþjóðabankans
FRÉTTATILKYNNING
frá utanríkisráðuneytinu
_____________
Nr. 33
Dagana 24. og 25. apríl fer fram á vegum utanríkisráðuneytisins fundur um málefni Alþjóðabankans, sem sóttur er af fulltrúum frá Norðurlöndunum og Eystrasaltsríkjunum, auk þátttakenda frá Alþjóðabankanum og Alþjóðagjaldeyrissjóðnum. Þetta er í fyrsta sinn sem utanríkisráðuneytið heldur slíkan samráðsfund eftir að ráðuneytið tók við umsjón málefna Alþjóðabankans af iðnaðar- og viðskiptaráðuneytinu í fyrra.
Þróunarmálefni og aðstoð Alþjóðabankans við þróunarlöndin verður helsta umræðuefni fundarins. Sérstakur gestur á fundinum verður Ali Bourhane, sem er einn af framkvæmda-stjórum Alþjóðabankans í Washington. Hann mun fjalla um þróunar- og uppbyggingarmál í Afríku (Partnership for Capacity Building in Africa). Ali Bourhane, sem er frá Comoroseyjum, er aðalfulltrúi á þriðja tug þróunarríkja í Alþjóðabankanum, sbr. meðfylgjandi lífshlaup hans.
Fundurinn í Reykjavík er í tengslum við fund þróunarmálanefndar Alþjóðabankans, sem haldinn verður í Washington 29. apríl, en utanríkisráðherra situr í forsæti fyrir hönd Norðurlandanna og Eystrasaltsríkjanna í nefndinni. Þróunarmálanefndin fjallar um og mótar stefnu í þeim málaflokkum, sem eru efst á baugi í starfi Alþjóðabankans hverju sinni. Ríkin átta reka sameiginlega skrifstofu í Alþjóðabankanum.
Til umræðu á fundinum verða einnig málefni sérstaks átaks í þágu skuldsettustu ríkjanna (Heavily Indebted Poor Countries Initative), málefni Alþjóðlegu fjárfestingar-ábyrgðarstofnunarinnar (MIGA), málefni Þróunarbanka Afríku (ADB), auk ýmissa mála er tengjast samstarfi ríkjanna í starfi bankans.
Utanríkisráðuneytið,
Reykjavík, 23. apríl 1997.