Nr. 062, 28. júní 2001 Sýning á íslenskri málaralist í Berlín
FRÉTTATILKYNNING
frá utanríkisráðuneytinu
________
Nr. 062
Sýning á íslenskri málaralist verður opnuð í sameiginlegu funda- og ráðstefnuhúsnæði norrænu sendiráðanna í Berlín fimmtudaginn 5. júlí næstkomandi og stendur til loka ágústmánaðar. Myndlistarmennirnir sem sýna í Berlín tilheyra hópi fjórtán listamanna er kalla sig Gullpenslana en á meðal þeirra eru kunnustu núlifandi málarar landsins sem eiga að baki fjölmargar einka- og samsýningar hérlendis og erlendis.
Sameiginlegt funda- og ráðstefnuhús norrænu sendiráðanna í Berlín hefur reynst kjörinn vettvangur fyrir margvíslega menningarstarfsemi af hálfu Norðurlanda frá því sameiginlegt sendiráðssvæði Íslands, Danmerkur, Noregs, Finnlands og Svíþjóðar var opnað í október 1999. Norræna sendiráðssvæðið hefur notið mikillar athygli í Þýskalandi og hefur þróast í að verða vinsæll áfangastaður tugþúsunda gesta á hverju ári. Svæðið er ekki síst vinsæll áfangastaður yfir sumartímann þegar innlendir og erlendir ferðamenn heimsækja stórborgina.
Sendiráð Íslands í Berlín hafði frumkvæði að því að koma sýningunni á laggirnar, í samstarfi við Listasafn Reykjavíkur.
Ingimundur Sigfússon, sendiherra Íslands í Berlín og Eiríkur Þorláksson, forstöðumaður Listasafns Reykjavíkur, opna sýninguna formlega 5. júlí næstkomandi.
Utanríkisráðuneytið
Reykjavík, 28. júní 2001.