Hoppa yfir valmynd
7. júní 2001 Utanríkisráðuneytið

Nr. 054, 7. júní 2001. Utanríkisráðherrafundur Eystrasaltsráðsins

FRÉTTATILKYNNING

frá utanríkisráðuneytinu

________




Nr. 054


Halldór Ásgrímsson, utanríkisráðherra, sat í dag utanríkisráðherrafund Eystrasaltsráðsins í Hamborg í Þýskalandi en Þjóðverjar gegna formennsku í Eystrasaltsráðinu í ár. Á fundinum var einkum rætt um svæðasamstarf í Norður-Evrópu, hina norðlægu vídd Evrópusambandsins og samstarf milli landanna á svæðinu.

Í ræðu Halldórs Ásgrímssonar kom fram mikilvægi svæðasamtaka í Norður-Evrópu og hinnar norðlægu víddar Evrópusambandsins. Utanríkisráðherra lagði áherslu á að samræma þyrfti verkefni og auka samvinnu svæðastofnana um málefni norðlægu víddarinnar, og sagði mikla möguleika á beinu samstarfi fyrirtækja, félagasamtaka, sveitastjórna og fleiri aðila á svæðinu. Í því samhengi gat utanríkisráðherra þess að Norðurlandasamstarfið hefði rutt brautina fyrir aukið samstarf ríkja við Eystrasalt.

Utanríkisráðherrarnir áttu óformlegan fund í hádeginu þar sem aðallega var rætt um málefni Mið-Austurlanda, en Joschka Fischer, utanríkisráðherra Þýskalands, er nýkominn frá Ísrael og Palestínu þar sem hann leitaðist við að koma á sáttum milli stríðandi fylkinga.

Við lok fundarins undirrituðu ráðherrarnir samkomulag um miðlun geislunarupplýsinga milli landanna.

Yfirlýsingu fundarins er að finna á heimasíðu Eystrasaltsráðsins á slóðinni www.baltinfo.org.







Utanríkisráðuneytið
Reykjavík, 7. júní 2001.



Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum