Að gefnu tilefni um TiSA viðræður
Ákvörðun um að Ísland tæki þátt var tekin í desember 2012 af þáverandi utanríkisráðherra og staðfest af núverandi ríkisstjórn í júní árið 2013. Litið var til þess að samstarfsríki okkar innan EFTA, Noregur og Sviss, taka þátt í viðræðunum svo og ESB og Bandaríkin þar sem Ísland á sína stærstu viðskiptahagsmuni.
Samningurinn mun byggja á GATS reglum og fjalla sérstaklega um sjóflutninga, orkumál, fjármagnsþjónustu, póstþjónustu, fjarskipti, aðgang þjónustuveitenda og rafræn viðskipti. Markmiðið er að fækka hindrunum sem standa í vegi fyrirtækjum sem starfa á vettvangi þjónustuviðskipta.
Ísland hefur lagt megináherslu á að ná sem bestum kjörum fyrir fyrirtæki á sviði hátækni- og orkumála og á sviði alþjóðlegra sjóflutninga. Undirbúningur hérlendis hefur því m.a. falist í því að eiga fundi með hagsmunasamtökum og fagráðuneytum auk þess sem að ítarlegt ferli fyrir hagsmunagreiningu fyrirtækja sem starfa erlendis á sviði þjónustuviðskipta hefur verið sett á laggirnar.
Flest þátttökuríkin hafa nú skilað inn tilboðum sínum og sendi Ísland inn upphafstilboð sitt vegna TiSA í desember sl. Tilboð Íslands byggir alfarið á íslenskri löggjöf og endurskoðuðu GATS tilboði frá árinu 2005 sem er endurspeglað í hefðbundnum listum vegna þjónustuviðskipta. Listinn var unninn í góðu samstarfi við fagráðuneytin. Einu breytingarnar sem gerðar voru á tilboðinu frá 2005 endurspegla metnað Íslands á sviði orkutengdrar þjónustu.
Áhersla hefur verið lögð á að upplýsa um framgang TiSA viðræðnanna og hafa verið haldnir upplýsingafundir m.a. með ASÍ, BSRB, BHM og SI, SA, SFF, SVÞ, Samtökum ferðaþjónustunnar, Íslenska jarðvarmaklasanum ofl. Þá hefur verið staðið að svokallaðri hagsmunainnköllun sem beint var til íslenskra fyrirtækja með upplýsingum um TiSA ferlið.
Utanríkisráðherra gerði ennfremur grein fyrir stöðu TiSA viðræðnanna í skýrslu sinni til Alþingis í mars sl.