Hoppa yfir valmynd
8. maí 2013 Utanríkisráðuneytið

Rafræn útgáfa:  Áætlun um alþjóðlega þróunarsamvinnu 2013-2016 og Jafnréttisstefna í þróunarsamvinnu

Gefnar hafa verið út á rafrænu formi; Áætlun um alþjóðlega þróunarsamvinnu 2013-2016 og jafnréttisstefna á sviði þróunarsamvinnu Íslands.

Tillaga til þingsályktunar um áætlun um alþjóðlega þróunarsamvinnu Íslands 2013-2016 var samþykkt á Alþingi hinn 21. mars sl.  Þróunarsamvinnuáætlun, eins og hún er nefnd í daglegu tali, skapar  heildstæða umgjörð um alþjóðlega þróunarsamvinnu íslenskra stjórnvalda. Hún felur í sér skýra forgangsröðun þar sem settar eru fram forsendur og markmið, og hvernig unnið skuli að þeim, hvort sem um er að ræða tvíhliða þróunarsamvinnu á vegum Þróunarsamvinnustofnunar Íslands, stuðning við fjölþjóðlegar stofnanir og verkefni á þeirra vegum, verkefni á vegum félagasamtaka eða starf í þágu friðar undir merkjum Íslensku friðargæslunnar. Í áætluninni er enn fremur að finna yfirlit yfir framlög til þróunarsamvinnu, en gert er ráð fyrir verulegri hækkun þeirra 2013 – 2016 í samræmi við markmið íslenskra stjórnvalda um að veita 0,7 % af vergum þjóðartekjum til alþjóðlegrar þróunarsamvinnu árið 2019.

Áherslulönd í þróunarsamvinnu Íslands eru fimm: Malaví, Mósambík, Úganda, Palestína og Afganistan, og lögð er áhersla á stuðning við fjórar lykilstofnanir í fjölþjóðlegu samstarfi; UNICEF, UN Women, Alþjóðabankann og Háskóla Sameinuðu þjóðanna á Íslandi. Málefnasviðin sem lögð er áhersla á eru heilbrigði, menntun, fiski- og orkumál, auk starfs í þágu friðar. Jafnréttis- og umhverfismál eru þverlæg málefni og neyðar- og mannúðaraðstoð skipar lykilhlutverk.

Jafnréttisstefna á sviði alþjóðlegrar þróunarsamvinnu Íslands er unnin í samræmi við þróunarsamvinnuáætlun og nær yfir alla þætti þróunarsamvinnunar. Hún byggir bæði á alþjóðlegum samþykktum og íslenskri löggjöf og því að kynjajafnrétti séu grundvallarmannréttindi. Lögð er áhersla á fjögur meginsvið; menntun, heilbrigði, auðlinda- og umhverfismál og konur, frið og öryggi.  Þau endurspegla jafnframt áhersluþætti þróunarsamvinnuáætlunar.

Í jafnréttisstefnunni kemur fram að unnið verði að kynjajafnrétti með tvennum hætti; annarsvegar með samþættingu kynjasjónamiða og hinsvegar með stuðningi við sérstök verkefni sem hafa kynjajafnrétti og valdeflingu kvenna að meginmarkmiði.

Yfirlit yfir þróunarsamvinnu Íslands

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum