Nr. 015, 29. mars 2001 Halldór Ásgrímsson, utanríkisráðherra, opnar nýja vefi fyrir íslensk sendiráð, fastanefndir og ræðisskrifstofur.
FRÉTTATILKYNNING
frá utanríkisráðuneytinu
Nr. 015
Halldór Ásgrímsson, utanríkisráðherra, opnaði í dag nýja vefi fyrir íslensk sendiráð, fastanefndir og sendiræðisskrifstofur. Nokkur sendiráð hafa um langt árabil rekið eigin vefsetur, m.a. sendiráðin í Washington, Helsinki, Brussel, Berlín og Moskvu. Útlit flestra vefsetranna hefur nú verið samræmt og bætt hefur verið við mikið af upplýsingum um Ísland og íslensk málefni. Á vefsetrunum eru einnig hlekkir í vefsetur stofnana, samtaka og fyrirtækja sem tengjast Íslandi. Veffang almennrar inngangssíðu fyrir utanríkisþjónustuna er www.iceland.org og er vísað til hennar á nýju vefsetri Stjórnarráðs Íslands, sem var opnað 22. mars s.l.
Meginkaflar vefanna eru þessir: Land og náttúra, þjóð og saga, menning og vísindi, ferðamenn og frístundir, viðskipta- og efnahagsmál og utanríkismál. Stærsti hluti efnisins verður á ensku til þess að byrja með, en stefnt er að því að fjölga tungumálum í áföngum í framtíðinni. Lögð verður áhersla á að sníða efnið sem mest að þörfum notenda í viðkomandi löndum.
Í tilraunaskyni hafa verið opnuð tvö "vefsendiráð", þ.e. vefsetur fyrir sendiráð Íslands í Ástralíu og Nýja Sjálandi, þótt þar séu engar sendiráðsskrifstofur. Vefnotkun er mikil í þessum löndum og er að vænta að þetta sé hagkvæm leið til þess að vekja athygli á landi og þjóð.
Utanríkisráðuneytið
Reykjavík, 29. mars 2001.