Ávarp ráðherra á þingi Norðurl.ráðs
FRÉTTATILKYNNING
frá utanríkisráðuneytinu
_____________
Halldór Ásgrímsson utanríkisráðherra flutti í dag ræðu um utanríkis- og öryggismál á 49. þingi Norðurlandaráðs sem haldið er í Helsinki dagana 10.-13. nóvember.
Í ræðu sinni fjallaði utanríkisráðherra um mikilvægi norræns samstarfs fyrir Íslendinga og undirstrikaði fjölþætt samstarf Norðurlanda. Hann fagnaði jafnframt aukinni umræðu um utanríkis- og öryggismál í víðu samhengi á vettvangi Norðurlandaráðs.
Í máli sínu vakti ráðherra athygli á auknu vægi svæðisbundinnar samvinnu og samræmingar á samstarfi Norðurlanda innan Eystrasaltsráðsins og Norðurskautsráðsins.
Utanríkisráðherra fjallað einnig um Schengen-samstarfið og lagði áherslu á að tryggja yrði þátttöku Íslendinga í umræðu um Schengen málefni innan Evrópusambandsins.
Ennfremur fagnaði hann hugmyndum finnskra stjórnvalda um "norðlæga vídd" í starfsemi Evrópusambandsins.
Reykjavík, 11. nóvember 1997