Nr. 020, 7. apríl 2000 60 ára afmæli utanríkisþjónustunnar
FRÉTTATILKYNNING
frá utanríkisráðuneytinu
Nr. 020
Utanríkisþjónusta Íslands minnist tímamóta í starfi sínu næstkomandi mánudag, 10. apríl. Þann dag verða sextíu ár liðin frá því að Íslendingar tóku framkvæmd utanríkismála í eigin hendur.
Í tilefni afmælisins mun Halldór Ásgrímsson, utanríkisráðherra, opna ljósmyndasýningu í Þjóðarbókhlöðunni sem helguð er 60 ára sögu íslenskrar utanríkisþjónustu. Sérstakur gestur utanríkisráðuneytisins verður Friis Arne Petersen, ráðuneytisstjóri danska utanríkisráðuneytisins.
Tilgangur ljósmyndasýningarinnar er að vekja athygli á mikilvægum viðburðum er tengjast sögu utanríkisþjónustunnar og endurspegla margvísleg verkefni starfsmanna hennar í sextíu ár. Við undirbúning sýningarinnar hefur verið lögð áhersla á að safna saman fjölbreyttu myndefni. Með ljósmyndasýningunni er lagður grunnur að ljósmyndasafni utanríkisráðuneytisins og bættri varðveislu myndefnis á sviði utanríkismála.
Ljósmyndasýningin í Þjóðarbókhlöðunni stendur frá 10. apríl til 10. maí næstkomandi. Stefnt er að því að sýningin verði sett upp á fleiri stöðum í kjölfarið.
Utanríkisráðuneytið
Reykjavík, 7. apríl 2000.