Loðnuveiðar danskra skipa
FRÉTTATILKYNNING
frá utanríkisráðuneytinu
_____________
Nr. 59
Vegna ágreinings þess sem upp er kominn milli Íslands og Danmerkur um loðnuveiðar danskra skipa á hafsvæði milli Íslands og Grænlands vill utanríkisráðuneytið taka fram eftirfarandi:
Samkvæmt samningnum um loðnustofninn á hafsvæðinu milli Íslands, Jan Mayen og Grænlands frá 29. júní 1994 eru grænlenskum og norskum fiskiskipum heimilar veiðar með vissum takmörkunum í íslenskri lögsögu. Hið sama gildir um færeysk fiskiskip samkvæmt sérstöku samkomulagi. Fiskiskipum af öðru þjóðerni, þ.á m. dönsku, hafa hins vegar ekki verið heimilaðarloðnuveiðar í íslenskri lögsögu.
Í bókuninni frá nóvember 1988, sem dönsk stjórnvöld vísa til, felst engin viðurkenning á rétti Dana til veiða á hinu umdeilda svæði.
Íslensk stjórnvöld hafa virt og munu virða ákvæði framangreindrar bókunar. Þau munu í samræmi við þau ákvæði tilkynna dönskum stjórnvöldum áður en gripið verður til hugsanlegra fullnustuaðgerða gagnvart dönskum skipum á svæðinu.
Utanríkisráðuneytið er reiðubúið til viðræðna við dönsk stjórnvöld í því skyni að jafna ágreining ríkjanna.
Utanríkisráðuneytið,
Reykjavík, 2. ágúst 1996