55. fundur þróunarmálanefndar Alþjóðabankans
FRÉTTATILKYNNING
frá utanríkisráðuneytinu
_____________
Nr. 36
Halldór Ásgrímsson, utanríkisráðherra, sat í dag 55. fund þróunarmálanefndar Alþjóðabankans í Washington. Utanríkisráðherra er í forsæti fyrir hönd Norðurlandanna og Eystrasaltsríkjanna í nefndinni, en í henni eiga sæti 24 ráðherrar fyrir hönd hátt á annað hundrað ríkja. Nefndin mótar meginstefnu bankans í aðstoð við þróunarlöndin.
Til umræðu á fundinum var sérstakt átak til aðstoðar skuldugustu þróunarríkjunum (Heavily Indebted Poor Countries Initiative), málefni Alþjóðlegu fjárfestingarábyrgðarstofnunarinnar (MIGA), fjárfestingar í samgöngu- og fjarskiptakerfi þróunarríkjanna af hálfu einkaaðila, tekjur Alþjóðabankans og stefnumótun í starfi hans (Strategic Compact).
Af hálfu Norðurlandanna og Eystrasaltsríkjanna lagði utanríkisráðherra fram yfirlýsingu með afstöðu þeirra til helstu málefna á dagskrá.
Í umræðunum lagði utanríkisráðherra mikla áherslu á, að stutt yrði við bakið á hinu sérstaka átaki til aðstoðar skuldugustu þróunarríkjunum (HIPC). Hann hvatti önnur ríki, ekki síst helstu iðnríki heims (G-7), til að leggja því lið. Utanríkisráðherra minntist einnig á nauðsyn þess, að Alþjóðabankinn hefði fjárhagslegt svigrúm til að leggja fé til annarra forgangsverkefna en HIPC-átaksins. Hann fagnaði ákvörðun um stuðning við Úganda og hvatti til þess, að ákvörðun um aðstoð við Bólivíu, Búrkina Fasó og Fílabeinsströndina yrði flýtt.
Í málflutningi ráðherra kom ennfremur fram, að nauðsyn bæri til að renna stoðum undir fjárhagsgrundvöll MIGA. Í því skyni væri mikilvægt að styrkja stefnumótun stofnunarinnar.
Ennfremur væri nauðsynlegt að tryggja tekjur Alþjóðabankans og þar með fjárhagslegt öryggi hans, til að hann mætti í framtíðinni gegna hlutverki sínu í aðstoð við þróunarríkin.
Hann lýsti stuðningi við þá viðleitni bankastjórnarinnar að bæta skipulag á starfsemi bankans með það fyrir augum að auka árangurinn í þeim löndum, sem þiggja aðstoð, auka þátttöku þeirra í starfi bankans og virkni í framkvæmdum.
Utanríkisráðherra lagði áherslu á mikilvægi þess, að aðstoð við þróunarlöndin héldist í hendur við frammistöðu viðkomandi landa í efnahagsuppbyggingu, en taldi einnig afar mikilvægt að aðstoða við framþróun á sem flestum sviðum samfélagsins, s.s. heilsugæslu, menntun, félagslegri þjónustu, auk þess sem að stuðlað yrði að jafnrétti kynjanna.
Meðfylgjandi er yfirlýsing utanríkisráðherra.
Utanríkisráðuneytið,
Reykjavík, 29. apríl 1997.