Friðargæsluliðar

Á árinu 2010 störfuðu á fjórða tug fólks að langtíma- og skammtímaverkefnum á vegum Íslensku friðargæslunnar. Friðargæsluliðar eru yfirleitt valdir í krafti góðrar reynslu af störfum erlendis eða sérstakrar þjálfunar, svo sem lögreglumenn, hjúkrunarfræðingar og mannréttindasérfræðingar. Íslenska friðargæslan hefur tekið í gagnið nýtt og aðengilegt rafrænt umsóknarferli fyrir umsækjendur um friðargæslustörf. Áhugasamir geta sótt um að vera á viðbragðslista Íslensku friðargæslunnar á vefsíðu utanríkisráðuneytisins. Gefin er út sérstök handbók fyrir friðargæsluliða með mikilvægum upplýsingum, svo sem siðareglum, sem þeir þurfa að tileinka sér. Friðargæsluliðar eru sendir á námskeið áður en þeir eru sendir á vettvang, m. a. öryggisnámskeið og jafnréttisnámskeið.