Orðspor
Eitt lykilverkefni stjórnvalda eftir bankahrunið er að endurreisa traust í íslensku samfélagi og efla orðspor Íslands erlendis. Í stefnuyfirlýsingu ríkisstjórnarinnar frá því í maí 2009 segir að á meðal meginverkefna utanríkisþjónustunnar á næstu árum verði að endurheimta orðspor Íslands á alþjóðavettvangi, byggja upp ímynd lands og þjóðar á grundvelli þekkingar, menningar og mannauðs og styðja við markaðssókn íslenskra fyrirtækja.
Utanríkisráðueytið, sendiráð og fastanefndir Íslands hjá alþjóðastofnunum halda málstað Íslands á lofti, almennt og í einstökum málum. Þau gæta þess að upplýsa önnur ríki reglulega um þróun og stöðu mála hérlendis og leita stuðnings við hagsmuni Íslands. Íslenskir ráðamenn gera slíkt hið sama við sín starfssystkin og hafa ennfremur veitt hundruð fréttaviðtala til að koma málstað Íslands á framfæri. Utanríkisráðuneytið vinnur náið með öðrum ráðuneytum til að samræma samskipti íslenskra stjórnvalda við erlenda fjölmiðla og koma réttum upplýsingum á framfæri um stöðu mála og stefnu íslenskra stjórnvalda.
Fyrir liggur á Alþingi frumvarp um Íslandsstofu á grunni Útflutningsráðs Íslands en tilgangur með stofnun hennar er að efla ímynd og orðspor Íslands, styrkja samkeppnisstöðu íslensks atvinnulífs á erlendum mörkuðum og ekki síst að stuðla að því að fá til landsins sem flesta erlenda ferðamenn og fá hingað erlenda fjárfestingu. Íslandsstofu er ætlað að vera samstarfsvettvangur opinberra og einkaaðila um stefnu og aðgerðir til að efla markaðs- og kynningarstarf á erlendri grundu, og þannig náist bæði hugmyndaleg og rekstrarleg samlegðaráhrif. Skv. frumvarpinu verður erlent kynningarstarf Ferðamálastofu rekið innan vébanda Íslandsstofu og gert er ráð fyrir að erlent kynningarstarf listmiðstöðva geti sömuleiðis fundið sér farveg innan hennar.