Samvinna um sameiginlega hagsmuni

Norðurlandaskrifstofa sinnir þverfaglegum málefnum Norrænu ráðherranefndarinnar á vegum ríkisstjórnar Íslands. Hún heyrir frá og með 1. október 2009 undir utanríkisráðuneytið en veitir jafnframt aðstoð þeim ráðherra sem falið er að fara með norrænt samstarf, samstarfsráðherra Norðurlanda.

Norðurlandaskrifstofa skipuleggur og samræmir norræn samstarfsmál á grundvelli Helsingforssamningsins (pdf-snið) sem Ísland, Danmörk, Finnland, Noregur og Svíþjóð eru aðilar að. Á skrifstofunni eru undirbúin mál sem lögð eru fyrir norræna samstarfsráðherra, norrænu samstarfsnefndina og að nokkru leyti fyrir forsætisráðherra.

Skrifstofan ber ábyrgð á undirbúningi ýmissa norrænna samstarfssamninga og málefna sem tengjast skipulagi og samræmingu í norrænu samstarfi. Auk þess undirbýr hún fjárveitingar til norræns samstarfs. Árleg skýrsla sem samstarfsráðherra Norðurlanda leggur fyrir Alþingi er unnin á skrifstofunni á grundvelli upplýsinga frá ráðuneytunum. Skrifstofan sinnir ennfremur ýmissi upplýsingastarfsemi og svarar fyrirspurnum um norrænt samstarf.

Ísland, Danmörk, Finnland, Noregur og Svíþjóð skiptast á um að hafa með höndum formennsku til eins árs í senn. Upplýsingar um formennsku í Norrænu ráðherranefndinni á norden.org.

Norðurlandaskrifstofa er frá og með 1. október 2009 með aðsetur í utanríkisráðuneytinu að Rauðarárstíg 25, sími: 545 9900, símbréf: 562 2373 og tölvupóstfang: nordurlandaskrifstofa.utn@utn.stjr.is

Skrifstofustjóri Norðurlandaskrifstofu er Snjólaug Ólafsdóttir. Aðrir starfsmenn eru Ragnheiður Harðardóttir og Hanne Fisker.