Samtímalist kynnt í sendiráðum Íslands

1.12.2011

  • Brussel---sh.-og-Paul-Dujardin-o.fl.

Fyrr í dag var ýtt úr vör sýningu 14 íslenskra samtímalistamanna í sendiherrabústað Íslands í Brussel að viðstöddum fjölda safn- og sýningarstjóra, galleríeigenda, blaðamanna og ljósmyndara.  Efnt var til sérstakrar kynningar á íslenskri samtímalist í samstarfi við listamiðstöðina BOZAR og héldu þær Dorothée Kirch forstöðumaður Kynningarmiðstöðvar íslenskrar myndlistar og Æsa Sigurjónsdóttir listfræðingur og sýningarstjóri  fyrirlestra. Þrír listamenn voru sérstaklega kynntir þau Gabríela Friðriksdóttir, Guðný Rósa Ingimarsdóttir og Haraldur Jónsson og tóku þau þátt í umræðum. Aðrir listamenn sem þátt taka í þessu verkefni eru Birgir Snæbjörn Birgisson, Eggert Pétursson, Gjörningaklúbburinn, Guðrún Kristjánsdóttir, Helgi Þorgils Friðjónsson, Húbert Nói, Ólöf Nordal, Steingrímur Eyfjörð, Svava Björnsdóttir, Tumi Magnússon og Þór Vigfússon.

Þórir Ibsen, sendiherra bauð til viðburðarins í samstarfi við Paul Dujardin forstöðumann BOZAR. Sýning á samtímalist í sendiráðinu er liður í sérstöku áhersluverkefni utanríkisþjónustunnar sem felur í sér kynningu á íslenskri myndlist og eflingu alþjóðlegs tengslanets á því sviði. Sendiráðin í Berlín, Kaupmannahöfn, París og Peking taka jafnframt þátt í verkefninu sem er framkvæmt af Kynningarmiðstöð íslenskrar myndlistar og sendiráðunum með fjárhagsstuðningi utanríkisráðuneytis og mennta- og menningarmálaráðuneytis. Viðburðurinn er liður í starfsáætlun sendiráðsins í Brussel á yfirstandandi ári en á næsta ári verður einnig lögð sérstök áhersla á að kynna íslenskar samtímabókmenntir í Benelúxlöndunum í kjölfar heiðursþátttöku Íslands á Bókasýningunni í Frankfurt.

Nánari upplýsingar má finna á heimasíðu sendiráðsins og Kynningarmiðstöðvar íslenskrar myndlistar

Dorotheé Kirch hjá Kynningarmiðstöð íslenskrar myndlistar í síma 6904960
Þórir Ibsen sendiherra Íslands í Brussel í síma: 5457913
Auður Edda Jökulsdóttir menningarfulltrúi utanríkisþjónustunnar í síma 8649956

Senda grein